އައްޑޫ ސިޓީ ގައި މަސައްކަތްކުރާ ފުލުހުންގެ މުވައްޒަފުންގެ އަގުވަޒަންކުރުމުގެ ގޮތުން ބޭއްވި "ސްޓާފް އެޕްރިސިއޭޝަން ނައިޓް" އެއް ބާއްވައިފިއެވެ.
ސެޕްޓެމްބަރު 24 ވަނަ ދުވަހު އީކުއޭޓަރ ވިލެކްގައި ބޭއްވި މި އިވެންޓްގައި އައްޑޫގައި ގާއިމްވެ ތިބޭ ފުލުހުންނާއި، އާންމު މުވައްޒަފުންގެ އިތުރުން، އެހެނިހެން ޑިޕާޓްމަންޓްތަކާއި ޔުނިޓްތަކުގެ މުވައްޒަފުން ބައިވެރިވެފައިވެއެވެ.
މި އިވެންޓަކީ މި އަހަރުގެ ދެވަނަ ކުއާޓަރުގައި ފުލުހުން ކޮށްފައިވާ އަގުހުރި މަސައްކަތްތައް ފާހަގަކޮށް، އެ ފަރާތްތަކުގެ އަގުވަޒަންކުރުމުގެ ގޮތުން ބޭއްވި ރަސްމިއްޔާތެކެވެ. މި ރަސްމިއްޔާތުގައި ވަނީ އެކި ދާއިރާތަކުން ފާހަގަކޮށްލެވޭ ކާމިޔާބީތައް ހޯދި މުވައްޒަފުންނަށް ވަނީ ހަނދާނީ ލިޔުން ހަވާލުކޮށްފައެވެ. މުވައްޒަފުންނަށް ސެޓްފިކެޓް ހަވާލުކޮށްދެއްވީ ސައުތު ޕޮލިސް ރީޖަންގެ ކޮމާންޑަރ، ޗީފް ސުޕްރިންޓެންޑެންޓް އޮފް ޕޮލިސް އަޙްމަދު ޝާކިރެވެ.
މި ރަސްމިއްޔާތުގައި ސައުތު ޕޮލިސް ރީޖަންގެ ކޮމާންޑަރުގެ އިތުރުން، އައްޑޫ ޕޮލިސް ކޮމާންޑަރ، ޗީފް އިންސްޕެކްޓަރ އޮފް ޕޮލިސް ރިލްވާން ޝަރީފް ވަނީ މުވައްޒަފުންނަށް ހިތްވަރު ދެއްވައި ވާހަކަ ދައްކަވާފައެވެ.