އައްޑޫ ސިޓީގެ ފެނާއި ނަރުދަމާގެ ހިދުމަތްތައް މާލެ ވޯޓަރ އެންޑް ސުވަރޭޖް ކޮމްޕެނީ (އެމް.ޑަބްލިޔު.އެސް.ސީ) ގެ ދަށަށް ބަދަލުކޮށްފިއެވެ.
މި ބަދަލު ގެނެސްފައިވާކަން އިއުލާންކުރެއްވީ އެމް.ޑަބްލިޔު.އެސް.ސީގެ މެނޭޖިންގ ޑިރެކްޓަރ ޙުސައިން ފަހުމީ އެވެ. ފަހުމީ އެކަން ހިއްސާކޮށް ސޯޝަލް މީޑިޔާގައި ކުރެއްވި ޕޯސްޓެއްގައި ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކޯޕަރޭޓް ދާއިރާ އިސްލާހުކުރުމަށް ގެންގުޅުއްވާ ހަރުދަނާ ސިޔާސަތުގެ ދަށުން ގެނެވުނު މުހިންމު ބަދަލެއް ކަމަށެވެ.
އައްޑޫ ސިޓީ ހިތަދޫއަށް ނިސްބަތްވާ ފަހުމީ ވިދާޅުވީ، އައްޑޫ ސިޓީގެ ހުޅުދޫ އަދި މީދޫ ހިމެނޭހެން، ދެ ސިޓީގެ ފެނާއި ނަރުދަމާގެ ނިޒާމު ހިންގުމާ އެ ކުންފުނިން ރަސްމީކޮށް ހަވާލުވެފައިވަނީ އޮކްޓޯބަރު 1 އިން ފެށިގެން ކަމަށެވެ.
އެމްޑަބްލިއުއެސްސީ އާއި ނަރުދަމާ އަދި ފެނާއި ގުޅޭ ޚިދުމަތްތައް ހަވާލުވުމުން، މި ހިދުމަތްތައް ބަދަލުކުރުމަށްޓަކައި އެމް.ޑަބްލިޔު.އެސް.ސީ އާއި ފެނަކަ ކޯޕަރޭޝަނާ ދެމެދު ވަނީ ހާއްސަ ފްރޭމްވޯކް އެއްބަސްވުމެއްގައި ސޮއިކޮށްފައެވެ. އަދި މި އެއްބަސްވުމުގެ ދަށުން، ދެ ސިޓީގެ ފެނާއި ނަރުދަމާއާ ގުޅުންހުރި އެންމެހައި އިންފްރާސްޓްރަކްޗަރާއި ވަސީލަތްތައް އެމް.ޑަބްލިޔު.އެސް.ސީގެ ދަށަށް ބަދަލުކުރުމުގެ މަރުހަލާ މިހާރު ވަނީ ނިމިފައެވެ.
