ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ދިނުމާއި ރަސްމީކޮށް ހަވާލުވެއްޖެ

އައްޑޫ ސިޓީގައި ކަރަންޓުގެ ޚިދުމަތް ދިނުމުގެ މަސައްކަތާ ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ރަސްމީކޮށް މިއަދު ހަވާލުވެއްޖެއެވެ.

މި ޚިދުމަތް ރަސްމީކޮށް ފެށުމުގެ ގޮތުން މިއަދު އައްޑޫ ސިޓީ ހިތަދޫގައި ވަނީ ޚާއްޞަ ދިދަ ނެގުމުގެ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ދިވެހިރާއްޖޭގެ ޤައުމީ ދިދަ ނަންގަވައިދެއްވީ ސްޓެލްކޯގެ މެނޭޖިންގ ޑިރެކްޓަރ ޑރ. ޢަލީ އަޒުވަރެވެ. އަދި ސްޓެލްކޯގެ ދިދަ ނަންގަވައިދެއްވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ ޢާއިޝަތު މުޒްނާއެވެ.

މި ރަސްމިއްޔާތުގައި ވާހަކަފުޅު ދައްކަވަމުން އެމްޑީ ޑރ. ޢަލީ އަޒުވަރު ވިދާޅުވީ، މީގެ 17 އަހަރު ކުރިންވެސް ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ދެމުން އައި ކަމަށެވެ. އަދި އައްޑޫ ސިޓީގެ ކަރަންޓުގެ ޚިދުމަތް އަލުން އަނބުރާ ސްޓެލްކޯއާ ޙަވާލުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަކީ، އައްޑޫގެ ރައްޔިތުންނަށް އިތުބާރުހުރި އަދި ދެމެހެއްޓެނިވި ޚިދުމަތެއް ކަށަވަރުކޮށްދެއްވުމަށްޓަކައި އެޅުއްވި ވަރަށް މުހިންމު ފިޔަވަޅެއްކަން ޑރ. އަޒުވަރު ފާހަގަކުރެއްވިއެވެ.

މީގެއިތުރުން، ސްޓެލްކޯގެ މެނޭޖިންގ ޑިރެކްޓަރު ޑރ. އަލީ އަޒުވަރާއި ކުންފުނީގެ އިސްވެރިންގެ ވަފުދެއް ވަނީ ގަން އިންޓަރނޭޝަނަލް އެއަރޕޯޓް ހިންގަމުންދާ އައްޑޫ އިންޓަރނޭޝަނަލް އެއަރޕޯޓް ކޮމްޕެނީ (އޭއައިއޭ) ގެ އިސްވެރިންނާ މިއަދު ބައްދަލުކުރައްވާފައެވެ.

މި ބައްދަލުވުމުގައި، ގަން އިންޓަރނޭޝަނަލް އެއަރޕޯޓު އަޕްގްރޭޑް ކުރުމަށް ކުރިއަށްދާ މަޝްރޫޢާއެކު އެއަރޕޯޓަށް އިތުރުވެގެންދާނެ ކަރަންޓުގެ ޑިމާންޑަށް ފުރިހަމައަށް ކޭޓަރ ކުރުމާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާކުރައްވާފައެވެ. އަދި އެ ކުންފުނީގެ މުހިންމު ބޭނުންތައް ދެނެގަނެ، އެއަރޕޯޓުގެ ކަރަންޓުގެ ވިއުގަ އިތުރަށް ވަރުގަދަކޮށް ހަރުދަނާކުރުމަށްޓަކައި ކުރެވެންހުރި މަސައްކަތްތަކާ ގުޅޭގޮތުންވެސް ދެފަރާތުގެ ދެމެދުގައި ވަނީ ޚިޔާލު ބަދަލުކުރައްވާފައެވެ.