އީފާސް މެދުވެރިކޮށް ވަދެވޭ މި ޕޯޓަލުން ލޯނުގެ މަރުހަލާތައް ވަގުތުން ބަލައިލެވޭނެ
ބޯހިޔާވަހިކަމަށް ދޫކުރާ ލޯނުތަކަށް އެދުމުގެ މަރުހަލާ ޑިޖިޓަލްކޮށް ފަސޭހަކުރުމުގެ ގޮތުން، ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) އިން ކަސްޓަމަރ ޕޯޓަލެއް ތައާރަފުކޮށްފިއެވެ.
އެ ކޯޕަރޭޝަނުން މީސްމީޑިއާގައި އާންމުކުރި ޕޯސްޓެއްގައި ބުނެފައިވާ ގޮތުގައި، މި ޕޯޓަލް މެދުވެރިކޮށް ގެދޮރު ބިނާކުރުމަށާއި ގަތުމަށް ފައިސާ ހޯދުމުގެ ކަންކަން މިހާރު ވަރަށް ފަސޭހައިން ކުރިއަށް ގެންދެވޭނެއެވެ.
މިއީ ކަރުދާހުގެ ލިޔެކިޔުންތަކަށް ބަރޯސާވުން ކުޑަކޮށް، ކަސްޓަމަރުންނަށް ގޭގައި ތިބެގެން ހިދުމަތް ހޯދޭނެ މަގު ތަނަވަސްކޮށްދިނުމަށް އެ ކޯޕަރޭޝަނުން ފެށި މަސައްކަތެކެވެ.
އެޗްޑީއެފްސީގެ ޕޯސްޓުގައި ބަޔާންކޮށްފައިވާ ގޮތުގައި، ކަސްޓަމަރުންނަށް މި ޕޯޓަލަށް ވަދެވޭނީ ސަރުކާރުގެ ޑިޖިޓަލް އައިޑެންޓިޓީ ނިޒާމު ކަމަށްވާ އީފާސް މެދުވެރިކޮށެވެ. މީގެ ސަބަބުން ކަސްޓަމަރުންގެ ޒާތީ މައުލޫމާތުތައް ރައްކާތެރިކަމާއެކު ބެލެހެއްޓި، ހިދުމަތްތައް ހޯދުމަށް އިތުރު ޔަގީންކަމެއް ލިބިގެންދެއެވެ.
ޕޯޓަލް މެދުވެރިކޮށް ލިބޭ މައިގަނޑު ފަސޭހަތަކުގެ ތެރޭގައި، ހުށަހަޅާފައިވާ އެޕްލިކޭޝަން ކުރިއަށްދާ ގޮތް ވަގުތުން ބަލައިލެވުމާއި، ފައިސާ ދެއްކުމުގެ ކަންކަން ވެސް އޮންލައިންކޮށް ފުރިހަމަކުރުން ހިމެނޭ ކަމަށް އެ ޕޯސްޓުގައި ފާހަގަކޮށްފައިވެއެވެ. މިވަގުތު ޕޯޓަލް މެދުވެރިކޮށް އެދެވެނީ ހޯމް ޕަރޗޭސް (ގެ ގަތުމަށް) އަދި ހޯމް ކޮންސްޓްރަކްޝަން (ގެ އިމާރާތްކުރުމަށް) ދޫކުރާ ފައިނޭންސް ފެސިލިޓީތަކަށެވެ.
މި ނިޒާމުގެ ތެރެއިން އިމާރާތްކުރުމުގެ ކުރެހުންތަކާއި، ކޮންޓްރެކްޓަރުންގެ މައުލޫމާތާއި، މާލީ ހިސާބުތައް ސީދާ ޕޯޓަލަށް އަޕްލޯޑުކުރެވޭނެ ކަމަށް އެޗްޑީއެފްސީގެ ވެބްސައިޓުގައި ބަޔާންކޮށްފައިވެއެވެ.
މި ޕޯޓަލް މެދުވެރިކޮށް އެދެވޭ ލޯނުތަކާ ގުޅޭގޮތުން އެޗްޑީއެފްސީގެ ރަސްމީ ވެބްސައިޓުގައި އާންމުކޮށްފައިވާ މައުލޫމާތަށް ބަލާއިރު، އެ ކޯޕަރޭޝަނުން އާންމު ލޯނުތަކާއި އިސްލާމީ އުސޫލުތަކާ އެއްގޮތަށް ދޫކުރާ ފައިނޭންސްގެ ހިދުމަތްތައް ފޯރުކޮށްދެއެވެ. ގެ އިމާރާތްކުރުމަށް ދޫކުރާ އާންމު ލޯނުތަކުގައި އަމިއްލައަށް ހަރަދުކުރަންޖެހޭ އެންމެ މަދު މިންވަރު (އިކުއިޓީ) ވަނީ 10 އިންސައްތައަށް ކުޑަކޮށްފައެވެ.
މި ލޯނުތަކުގެ އިންޓަރެސްޓް ރޭޓް 11 އިންސައްތައާއި 11.75 އިންސައްތައާ ދެމެދުގައި އުޅޭއިރު، ފައިސާ އަނބުރާ ދެއްކުމަށް 25 އަހަރުގެ ދިގު މުއްދަތެއް ލިބެއެވެ. އަދި އިމާރާތްކުރަމުންދާ ދުވަސްވަރު ފައިސާ ދައްކަން ނުޖެހޭ ގޮތަށް 24 މަސްދުވަހުގެ ގްރޭސް ޕީރިއަޑެއް ވެސް ދޭ ކަމަށް އެ ވެބްސައިޓުގައި ބުނެފައިވެއެވެ.
މީގެ އިތުރުން، އިސްލާމީ ޝަރީއަތުގެ ހަމަތަކުގެ މަތިން ފައިނޭންސް ހޯދަން ބޭނުންވާ ފަރާތްތަކަށް، އެޗްޑީއެފްސީގެ އިސްލާމިކް ވިންޑޯ އެޗްޑީއެފްސީ އަމްނާ މެދުވެރިކޮށް ހިދުމަތްތައް ލިބެން ހުރެއެވެ. އޭގެ ތެރޭގައި "މުޝާރަކާ މުތަނާގިސާ" (ޑިމިނިޝިންގ ޕާޓްނަރޝިޕް) އުސޫލުން ބިން ގަތުމަށާއި ގެ އިމާރާތްކުރުމަށް ފައިސާ ހަމަޖައްސައިދިނުމާއި، ގެ މަރާމާތުކުރުމަށް "މުރާބަހާ" އުސޫލުން ފައިނޭންސް ކުރުން ހިމެނެއެވެ.
އެޗްޑީއެފްސީގެ ހިދުމަތްތައް ޑިޖިޓަލްކުރުމުގެ ސަބަބުން، މާލެއަށް ދަތުރުނުކޮށް ރަށްރަށުގައި ތިބެގެން ލިޔެކިޔުންތައް ހުށަހެޅުމުގެ ފުރުސަތު އަތޮޅުތަކުގެ ރައްޔިތުންނަށް ފަހިވެގެންދާނެއެވެ.
މީގެ އިތުރުން، އަލަށް ގެދޮރު ގަންނަ ނުވަތަ އިމާރާތްކުރާ ފަރާތްތަކަށް ދިމާވާ މާލީ ދަތިތައް ހައްލުކުރުމަށް ސަރުކާރުން ދާދިފަހުން ތައާރަފުކުރި "ހެލްޕް ޓު ބިލްޑް" އަދި "ހެލްޕް ޓު ބައި" ސްކީމްތަކުގައި ވެސް އެޗްޑީއެފްސީން ވަނީ ބައިވެރިވެފައެވެ.
މި ސްކީމްތަކުގެ ދަށުން ފުރަތަމަ ފަހަރަށް ގެދޮރު އިމާރާތްކުރާ ފަރާތްތަކަށް އިކުއިޓީގެ ގޮތުގައި 2 ލައްކަ ރުފިޔާއާ ހަމައަށް އެހީތެރިކަން ފޯރުކޮށްދޭނެއެވެ.
މި ޕޯޓަލް ތައާރަފުކުރުމަކީ ރާއްޖޭގެ މާލީ ދާއިރާގެ ހިދުމަތްތައް ޑިޖިޓަލްކޮށް، އާންމުންނަށް ފަސޭހައިން ވާސިލުވެވޭނެ މަގު ތަނަވަސްކުރުމަށް އެޅުނު މުހިންމު ފިޔަވަޅެކެވެ. މި ބަދަލާއެކު، ބޯހިޔާވަހިކަމުގެ މަޝްރޫއުތަކަށް ފައިސާ ހޯދުމަށް ހޭދަވާ ވަގުތު ކުޑަވެ، އެޕްލިކޭޝަންތައް ޕްރޮސެސްކުރުމުގެ މަސައްކަތް އިތުރަށް އަވަސްވެގެންދާނެ ކަމަށް ބެލެވެއެވެ.
