ނޭޗަރ ޕާކް ބެލެހެއްޓުމަށް ކައުންސިލްގެ ނަމުގައި ހުރި އެސެޓްތަކާއި ޔުޓިލިޓީސް އަދި އެ ޕާކާ ގުޅިގެން ބާކީ ހުރި ފައިސާ މިނިސްޓްރީ އޮފް ކްލައިމެޓް ޗޭންޖް، އެންވަޔަރަމަންޓް އެންޑް އެނަރޖީއަށް އަނބުރާ ހަވާލުނުކުރުމަށް ކައުންސިލުން ނިންމައިފިއެވެ.
މިގޮތަށް ނިންމާފައިވަނީ 26 އޮގަސްޓް 2026 ގައި ބޭއްވުނު އެ ކައުންސިލްގެ 5 ވަނަ ދައުރުގެ 14 ވަނަ ރަސްމީ ޖަލްސާ (މި އަހަރުގެ 22 ވަނަ ޖަލްސާ) ގައެވެ.
މި މައްސަލައަކީ ނޭޗަރ ޕާކް ބެލެހެއްޓުމަށް ކައުންސިލްގެ ނަމުގައި ހުރި އެސެޓްތަކާއި، ޔުޓިލިޓީސްގެ އިތުރުން އައްޑޫ ކޮންޒަވޭޝަން ޓްރަސްޓް ފަންޑުގައި ބާކީ ހުރި ފައިސާ އާއި، އެންވަޔަރަމަންޓް މިނިސްޓްރީން ކައުންސިލަށް ޓްރާންސްފަރކޮށް ބޭނުންނުކުރެވި ހުރި ފައިސާ އަނބުރާ މިނިސްޓްރީއަށް ބަދަލުކުރުމަށް އެދި އެ މިނިސްޓްރީން ސިޓީއަކުން ހުށަހެޅުމާ ގުޅިގެން، ކައުންސިލްގެ ސޯޝަލް އެފެއާޒް ޔުނިޓުން ގޮތެއް ނިންމުމަށް އެދި ހުށަހެޅި މައްސަލައެކެވެ.
