މުވައްޒަފުން މަދުކުރަނީ ކުންފުނި ރައިޓް ސައިޒް ކުރުމުގެ އުސޫލުގެ ދަށުން ކަމަށް ވެމްކޯއިން ބުނޭ
އައްޑޫ ސިޓީގައި ހުންނަ ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ ބްރާންޗުން، މަސައްކަތަށް ފަރުވާކުޑަ އަދި އޮފީހަށް ހާޒިރުނުވާ މުވައްޒަފުން ވަޒީފާއިން ވަކިކޮށްފިއެވެ.
ވެމްކޯއިން ބުނި ގޮތުގައި މި ފިޔަވަޅު އެޅީ ކުންފުނީގެ މަސައްކަތްތައް ހަރުދަނާކުރުމަށް ކުރިއަށްގެންދާ މުވައްޒަފުން މަދުކުރުމުގެ ޕްރޮގްރާމްގެ ދަށުންނެވެ.
މިކަމާ ގުޅޭގޮތުން ވެމްކޯގެ އޮފިޝަލަކު ވިދާޅުވި ގޮތުގައި، ވަޒީފާއިން ވަކިކުރަން ނިންމި މުވައްޒަފުންގެ ތެރޭގައި ގިނައީ އޮފީހަށް ހާޒިރުވެ ސޮއިކުރުމަށްފަހު ބޭރުގައި އުޅޭ މީހުންނެވެ. އޭގެ އިތުރުން، އޮފީހަށް ފައިދާހުރި މަސައްކަތެއް ނުކުރާ މީހުންނާއި، އޮފީހުގެ ކަންކަމުގައި އެއްވެސް ވަރަކަށް ބައިވެރިނުވާ މުވައްޒަފުން ވެސް މީގެ ތެރޭގައި ހިމެނޭ ކަމަށް އޭނާ ވިދާޅުވިއެވެ. އޮފިޝަލް ވިދާޅުވި ގޮތުގައި ވަކިކުރީ “ސައިން އިން ކޮށްފައި ބޭރުގައި ތިބޭ މުވައްޒަފުންނާއި، އަދި އޮފީހަށް ފާއިދާ ހުރި މަސައްކަތެއް ނުކުރާ، އޮފީހުގެ ކަންކަމުގައި އިންޕުޓް ނުދޭ” މީހުންނެވެ.
މުވައްޒަފުންގެ ހާޒިރީއާ ގުޅޭގޮތުން ވާހަކަދައްކަމުން އޮފިޝަލް ވިދާޅުވީ، ބައެއް މުވައްޒަފުން މަސައްކަތަށް ނުނިކުމެ ގިނަ ދުވަސްތަކެއް ހޭދަކުރާ ކަމަށެވެ. “ނާންނަ ދުވަސް އެބަހުރި ބައެއް ސްޓާފުންގެ އެހާ ގިނައިން. މުވައްޒަފުން މި މަދުކުަރަނީ އުސޫލާއި އެއްގޮތަށް ރައިޓް ސައިޒް ކުރުމަށް. އިސްކަންދީގެން،” އޭނާ ވިދާޅުވިއެވެ. ވަޒީފާއިން ވަކިކުރާ މުވައްޒަފުންނަކީ ކުންފުނީގެ އޮޕަރޭޝަންތަކަށް އެކަށީގެންވާ ވަރަށް އެއްބާރުލުން ނުދޭ މީހުން ކަމަށް ވެސް އޭނާ ފާހަގަކުރެއްވިއެވެ.
ސަރުކާރު ހިއްސާވާ ކުންފުނިތަކުގެ ހަރަދު ކުޑަކުރުމުގެ ގޮތުން، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ ކުންފުނިތަކުގެ މުވައްޒަފުން މަދުކުރުމަށް އަންގާފައެވެ. މި އެންގުމާ ގުޅިގެން ވެމްކޯއިން އައްޑޫ ސިޓީގައި ދެމުންގެންދާ ކުނި މެނޭޖުކުރުމުގެ ހިދުމަތްތަކަށް ބުރޫނާރާނެ ގޮތަކަށް މުވައްޒަފުންގެ އަދަދު މަދުކުރުމުގެ މަސައްކަތް އަންނަނީ ކުރަމުންނެވެ. އައްޑޫ ސިޓީގައި ވެމްކޯގެ ހިދުމަތް ފުޅާކޮށް، ގޭބިސީތަކުން ކުނި ނެގުމުގެ މަސައްކަތް ކުރަމުން އަންނައިރު، މަސައްކަތަށް ފަރުވާކުޑަ މުވައްޒަފުން ވަކިކުރުމުން ހިދުމަތުގެ ފެންވަރު ރަނގަޅުވެގެންދާނެ ކަމަށް އެ ކުންފުނިން ދެކެއެވެ.
ފަހަކަށް އައިސް ސަރުކާރުގެ އެހެން ބައެއް ކުންފުނިތަކުން ވެސް ވަނީ މިފަދައިން މުވައްޒަފުން މަދުކުރުމުގެ މަސައްކަތް ފަށާފައެވެ. އެގޮތުން ފެނަކަ ކޯޕަރޭޝަނުން ވެސް އައްޑޫ ސިޓީގައި މަސައްކަތްކުރާ ގިނަ އަދަދެއްގެ މުވައްޒަފުން ވަޒީފާއިން ވަކިކޮށްފައިވާކަން ފާހަގަކުރެވެއެވެ. ނަމަވެސް ވެމްކޯއިން ބުނާ ގޮތުގައި އެ ކުންފުނިން މުވައްޒަފުން ވަކިކުރަނީ ހަމައެކަނި މަސައްކަތަށް ފަރުވާކުޑަކުރުމާއި ހާޒިރީގެ މައްސަލަތަކަށް ބެލުމަށްފަހުގައެވެ.
މީގެ އިތުރުން، އައްޑޫ ސިޓީގެ އެކި އަވަށްތަކުގައި ކުނި ނެގުމުގެ މަސައްކަތް ގަވާއިދުން ކުރިއަށްގެންދިއުމަށްޓަކައި، މަސައްކަތަށް ފަރުވާތެރި މުވައްޒަފުންގެ ބޭނުންތެރިކަން ބޮޑުކަމަށް ވެމްކޯއިން ފާހަގަކުރެއެވެ. ކުންފުނީގެ އަމާޒަކީ ރައްޔިތުންނަށް ދެމުންގެންދާ ހިދުމަތްތައް މެދުނުކެނޑި، އެންމެ ފުރިހަމަ ގޮތުގައި ފޯރުކޮށްދިނުން ކަމަށް ވެސް އެ ކުންފުނިން ބުނެފައިވެއެވެ. މި ބަދަލާއެކު، ކުންފުނީގެ އޮޕަރޭޝަންތައް އިތުރަށް ހަރުދަނާކުރުމަށް ވެމްކޯއިން އަންނަނީ މަސައްކަތް ކުރަމުންނެވެ.
