އައްޑޫ އިކުއިޓޯރިއަލް ހޮސްޕިޓަލް (އޭއީއެޗް) އިން މެޑިކަލް ކޮންޒިއުމަބަލްސް އަދި މެޝިނަރީޒް ހޯދުމުގައި ދައުލަތުގެ މާލިއްޔަތު ގަވާއިދާ ޚިލާފަށް އަމަލުކޮށްފައިވާކަން އޮޑިޓަރ ޖެނެރަލްގެ އޮފީހުން ނެރެފައިވާ އެ ހޮސްޕިޓަލުގެ އޮޑިޓް ރިޕޯޓުން ހާމަވެއްޖެއެވެ.
އޮޑިޓް ރިޕޯޓުގައި ފާހަގަކޮށްފައިވަނީ އޭއީއެޗްއިން 2022 ވަނަ އަހަރުން ފެށިގެން 2024 ވަނަ އަހަރުގެ ނިޔަލަށް ކޮށްފައިވާ ޚަރަދުތަކާއި ގުޅޭގޮތުންނެވެ.
އެގޮތުން އޭއީއެޗް އަށް މެޑިކަލް ކޮންޒިއުމަބަލްސް އަދި މެޝިނަރީސް ހޯދުމަށް ޖުމުލަ 183,924,350 (އެއްސަތޭކަ އަށްޑިހަ ތިން މިލިޔަން ނުވަ ސަތޭކަ ސައުވީސް ހާސް ތިން ސަތޭކަ ފަންސާސް) ރުފިޔާ ޚަރަދުކޮށްފައިވާކަން ވަނީ ހާމަވެފައެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، މެޑިކަލް ކޮންޒިއުމަބަލްސް އަދި މެޝިނަރީސް ހޯދުމަށް އޭއީއެޗް އިން ވަނީ އެ މުއްދަތުގައި ހޮސްޕިޓަލަށް ކަނޑައަޅާފައިވާ ޖުމުލަ ބަޖެޓުގެ %23.8 ޚަރަދުކޮށްފައެވެ. މީގެ އިތުރުން މާކެޓް ރޭޓަށްވުރެ ބޮޑު އަގުގައި އޭއީއެޗްއަށް ތަކެތި ގަނެފައިވާ ކަމަށް ފާހަގަކުރެވިފައިވާތީ މިއީ ކޮންޓްރޯލްތަކާއި ގަވާއިދުތަކާ ޚިލާފުވުމުގެ ބޮޑު ރިސްކެއް އޮތް ކަމެއްގެ ގޮތުގައި ވެސް އޮޑިޓް ރިޕޯޓުން ފާހަގަކޮށްފައިވެއެވެ.
މީގެ އިތުރުން އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، ދައުލަތުގެ މާލިއްޔަތު ގަވާއިދުގައި ދައުލަތުގެ ފައިސާ ހޭދަކުރަންވާނީ ވާދަވެރި މާހައުލެއްގެ ތެރެއިން އެންމެ ފައިދާހުރި އަދި ޒިންމާދާރު ގޮތެއްގައި ކަމަށް ބަޔާންކޮށްފައި އޮތް ނަމަވެސް، އޭއީއެޗް އިން އަމަލުކޮށްފައިވަނީ އެއާއި ޚިލާފަށެވެ.
