އައްޑޫގައި ވާހަކަ ދެއްކުމުގެ މުބާރާތެއް ބާއްވަނީ

އައްޑޫ ސިޓީގައި ވާހަކަދެއްކުމުގެ މުބާރާތަކާއި ބަހުސް މުބާރާތެއް ބޭއްވުމަށް ނިންމައިފިއެވެ. 

އޮކްޓޯބަރު 7 ވަނަ ދުވަހު ބާއްވާ މި މުބާރާތުގައި ޖުމްލަ 14 ސްކޫލަކުން ބައިވެރިވުމަށް ވަނީ ހަމަޖެހިފައެވެ.

މި މުބާރާތް ބާއްވަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އާއި، އައްޑޫ ސިޓީ ކައުންސިލް އަދި ދިވެހިރާއްޖޭގެ ޤައުމީ ޔުނިވަރސިޓީގެ ހިތަދޫ ކެމްޕަސް ގުޅިގެންނެވެ. 

މިމުބާރާތާއި ގުޅޭގޮތުން މިއަދު އައްޑޫ ސިޓީ ކައުންސިލާއި ޤައުމީ ޔުނިވަރސިޓީގެ ދަރިވަރުންގެ ޔޫނިއަން އާއި އަދި ޤައުމީ ޔުނިވަރސިޓީގެ ހިތަދޫ ކެމްޕަސް އާއި ދެމެދު މިއަދު ވަނީ ފަހުމުނާމާއެއްގައި ސޮއިކޮށްފައެވެ. 

އައްޑޫ ބޮޑުފަނޑިޔާރު ތަކުރުފާނުގެ ހަނދާނީ ވާދައިގެ ތަށްޓަށް ބާއްވާ ވާހަކަދެއްކުމުގެ މުބާރާތް ބާއްވަނީ، އައްޑޫ ސިޓީ އަދި ފުވައްމުލަކު ސިޓީގެ އިސްކޫލުތަކުގެ ދަރިވަރުންނަށެވެ. އަދި ފުވައްމުލަކު ސިޓީއާއި އައްޑޫ ސިޓީގެ މުއައްސަސާތަކާއި ޖަމުޢިއްޔާ ޖަމާޢަތްތަކާއި ޢާންމު ފަރުދުންނަށް ޢާންމުކޮށް ހުޅުވާލައިގެން ކުރިއަށްގެންދަނީ ”އައްޝައިޚް ޙުސައިން ޝަރަފުއްދީންގެ ހަނދާނީ ވާދައިގެ ތަށްޓަށް ބާއްވާ ބަހުސް މުބާރާތެވެ. މި ދެ މުބާރާތް ވެސް ކުރިއަށް ގެންދަނީ އައްޑޫ ސިޓީގައެވެ.

މި މުބާރާތުގައި 138 ފަރާތަކުން ބައިވެރިވެފައިވާއިރު، މި ދެ މުބާރާތް ވެސް ކުރިއަށް ގެންދަނީ އައްޑޫ ސިޓީގައި ހުންނަ ޕޮލިސް އެކަޑެމީގައެވެ.