ސަރުކާރުގެ "އަހާ" ފޯރަމްގެ ނުވަވަނަ ބައްދަލުވުން 11 އޮކްޓޯބަރު 2026 ވާ އާދީއްތަ ދުވަހުގެ ރެއަށް ތާވަލުކޮށްފިއެވެ. ރައީސުލްޖުމްހޫރިއްޔާގެ އޮފީހުން ބުނި ގޮތުގައި، މި ފޯރަމްގައި އާންމުންނަށް ސުވާލު ހުށަހެޅުމުގެ ފުރުސަތު މިހާރު ވަނީ ހުޅުވާލާފައެވެ.
މިއީ ސަރުކާރުގެ މަސައްކަތްތައް އޮޅުންފިލުވައިދިނުމަށާއި ރައްޔިތުންގެ ސުވާލުތަކަށް ވަޒީރުން ސީދާ ޖަވާބުދެއްވުމަށް ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ (ޕީއެސްއެމް) ގުޅިގެން ކުރިއަށްގެންދާ ސިލްސިލާ ޕްރޮގްރާމެކެވެ. މި ސިލްސިލާގެ އަށްވަނަ ބައްދަލުވުން ބާއްވާފައިވަނީ މި މަހުގެ 4 ވަނަ ދުވަހުއެވެ.
ދެ ގަޑިއިރަށް ދެމިގެންދާ ގޮތަށް ލައިވްކޮށް ގެނެސްދޭ މި ފޯރަމްގައި ބައިވެރިވެވަޑައިގަންނަވާނީ ކެބިނެޓުގެ ތިން ވަޒީރުންނެވެ. ޕީއެސްއެމްއިން ރިޕޯޓުކޮށްފައިވާ ގޮތުގައި، މި ފޯރަމްގައި ބައިވެރިވާ ވަޒީރުންނާ ސުވާލުކުރުމަށް ގިނަ ފުރުސަތުތަކެއް ވަނީ ފަހިކޮށްދީފައެވެ. އެގޮތުން، ފޯރަމް ކުރިއަށްދާ ވަގުތު އެ ތަނަށް ހާޒިރުވެގެން ސީދާ ސުވާލުކުރުމުގެ ފުރުސަތު އޮންނާނެއެވެ. އަދި އޭގެ އިތުރުން، ޕީއެސްއެމް އެއަރ އެޕްލިކޭޝަން މެދުވެރިކޮށް ވެސް އާންމުންނަށް ސުވާލުތައް ފޮނުވޭނެ އިންތިޒާމު ވަނީ ހަމަޖައްސާފައެވެ. މި ފޯރަމްގެ އަމާޒަކީ ރައްޔިތުންގެ ހުރި ކަންބޮޑުވުންތަކާއި ޝަކުވާތަކަށް އެންމެ އިސްވެރިންގެ ފަރާތުން ސީދާ ޖަވާބު ހޯދައިދިނުމާއި، ސަރުކާރުގެ ސިޔާސަތުތަކާއި މަޝްރޫއުތަކުގެ އެންމެ ފަހުގެ މައުލޫމާތު އާންމުންނާ ހިއްސާކުރުމެވެ.
ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒުގެ ސަރުކާރުން "އަހާ" ފޯރަމް ތައާރަފުކުރީ 2024 ވަނަ އަހަރުގެ ޖެނުއަރީ މަހުގައެވެ. ސަރުކާރުން ބުނާ ގޮތުގައި، މި ސިލްސިލާގެ މައިގަނޑު ބޭނުމަކީ ދެފުށްފެންނަ އަދި ޖަވާބުދާރީވާ ސަރުކާރެއް ހިންގުމަށް ވެފައިވާ ވައުދު ފުއްދުމެވެ. ވަޒީރުންގެ ފެންވަރުގައި މި ފޯރަމް ކުރިއަށްގެންދާއިރު، ރައްޔިތުންނަށް ސީދާ ރައީސުލްޖުމްހޫރިއްޔާއާ ބައްދަލުކޮށް ސުވާލު ދެންނެވުމަށް "ރައްޔިތުންގެ އަޑު" ގެ ނަމުގައި ވެސް ހާއްސަ ޕްރޮގްރާމެއް އަންނަނީ ހިންގަމުންނެވެ. ރައީސް އޮފީހުން ހާމަކޮށްފައިވާ ގޮތުގައި، މި ޕްރޮގްރާމްގެ ދަށުން ރާއްޖޭގެ 93 ދާއިރާގެ ރައްޔިތުންނަށް ރައީސާ ބައްދަލުކޮށް، އެ މީހުންގެ ކަންބޮޑުވުންތައް ހިއްސާކުރުމުގެ ފުރުސަތު ވަނީ ފަހިކޮށްދީފައެވެ. އަދި މިހާތަނަށް ގިނަ ބަޔަކު ވަނީ މި ޕްރޮގްރާމް މެދުވެރިކޮށް ރައީސާ ބައްދަލުކޮށްފައެވެ.