ސ. ހުޅުދޫ ކައުންސިލްގެ މެންބަރުން ސިވިލް ސަރވިސް ކޮމިޝަން (ސީއެސްސީ) އާ މިއަދު ބައްދަލުކޮށްފިއެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައިވަނީ އަލަށް އުފެއްދި ކައުންސިލް ހިންގުމުގައި ދިމާވެފައިވާ އިދާރީ ގޮންޖެހުންތަކާ ގުޅޭގޮތުން ކަމަށް އެ ކައުންސިލުން ބުނެއެވެ.
ހުޅުދޫ ކައުންސިލަކީ އައްޑޫ ސިޓީ ކައުންސިލްގެ ދަށުން އެ ރަށް ވަކިކުރުމަށްފަހު، ރައީސް ޑރ. މުހައްމަދު މުއިއްޒު އުފައްދަވާފައިވާ ވަކި ކައުންސިލެކެވެ. އައްޑޫ ސިޓީ ކައުންސިލުން ހުޅުދޫ ވަކިކުރުމަށް ރައީސް ނިންމެވީ 25 އޮކްޓޯބަރު 2025 ގައި ނެގި ރައްޔިތުންގެ ފެންނަ ނުފެންނަ ވޯޓުގައި، ވަކި ކައުންސިލެއް އުފެއްދުމަށް ހުޅުދޫގެ ގިނަ ރައްޔިތުން ވޯޓު ދިނުމާ ގުޅިގެންނެވެ. މިދިޔަ އަހަރު ބޭއްވި އެ ރެފަރެންޑަމްގައި ހުޅުދޫގެ އިތުރުން މީދޫގެ ރައްޔިތުންވެސް ވަނީ އައްޑޫ ސިޓީ ކައުންސިލުން ވަކިވެ، އަމިއްލަ ކައުންސިލެއް އުފެއްދުމަށް ތާއީދުކޮށްފައެވެ. ނަމަވެސް ފޭދޫ ރައްޔިތުން ނިންމީ އައްޑޫ ސިޓީ ކައުންސިލްގެ ދަށުގައި ދެމިއޮތުމަށެވެ.