މިއީ 2001 ވަނަ އަހަރު އިންގްލެންޑްގެ މައިކަލް އޮވެން މި އެވޯޑު ހޯދި ފަހުން، މިދިޔަ 25 އަހަރުގެ ތެރޭގައި މި ޝަރަފުވެރި އެވޯޑު އިންގްލެންޑްގެ ކުޅުންތެރިއަކު ހާސިލްކުރި ފުރަތަމަ ފަހަރު
ދުނިޔޭގެ އެންމެ މޮޅު ކުޅުންތެރިޔާއަށް ދޭ ބަލޮންޑޯ އެވޯޑް، އިންގްލެންޑާއި ބަޔާން މިއުނިކްގެ ފޯވާޑް ހެރީ ކޭން ހާސިލްކޮށްފިއެވެ.
މިއީ 2001 ވަނަ އަހަރު އިންގްލެންޑްގެ މައިކަލް އޮވެން މި އެވޯޑު ހޯދި ފަހުން، މިދިޔަ 25 އަހަރުގެ ތެރޭގައި މި ޝަރަފުވެރި އެވޯޑު އިންގްލެންޑްގެ ކުޅުންތެރިއަކު ހާސިލްކުރި ފުރަތަމަ ފަހަރެވެ.
އުމުރުން 33 އަހަރުގެ ކޭން ބުނީ މި ޝަރަފުވެރި އެވޯޑު ކާމިޔާބުކުރެވުނީ ވަރަށް ގިނަ ކަންތައްތަކެއް އެންމެ ރަނގަޅަށް ކުރެވިގެން ކަމަށެވެ.
"ކުރިމަތިލާންޖެހުނު އުނދަގޫތަކާއި، އަޑިގުޑަންތައް ތަހައްމަލުކޮށް، ހިތްވަރާއި، އަޒުމާއި، އަމިއްލަ ނަފްސަށް ކުރާ އިތުބާރުގެ ތެރެއިން ކަންކަމުގައި ހޯދައި ކުރިއެރުމުގެ ސަބަބުން ކޮންމެ ކަމެއްވެސް ހާސިލުކުރެވިދާނެ. މި ކަންކަމަކީ އެހެން މީހުންނަށް ފެންނާނެ ކަންކަމެއް ނޫން،" ކޭން ބުންޏެވެ.
ކޭން ބުނީ، ބަލޮންޑޯ އެވޯޑް ހާސިލްކުރުމަށް އޭނާ ކުރި ދަތުރަކީ ފަސޭޙަ ދަތުރެއް ނޫން ކަމަށާއި، އޭނާ އެންމެ އުހަށް އެހީ ހަމަ ކުއްލިއަކަށް ނޫން ކަމަށެވެ. މިހާރު މިހުރި މަގާމަށް އާދެވުނީ، ގިނަ ނާކާމިޔާބީތަކާ ކުރިމަތިލައި، ވަރަށް ބުރަކޮށް މަސައްކަތްކޮށްގެން ކަމަށް ކޭން ފާހަގަކުރިއެވެ.
މި އެވޯޑަށް ކޭންއާ އެންމެ ގާތުން ވާދަކުރީ ދެވަނަ އަށް ދިޔަ ފްރާންސްގެ ކެޕްޓަން، ކީލިއަން އެމްބާޕޭއާއި އަހަރުގެ އެންމެ މޮޅު ޒުވާން ކުޅުންތެރިޔާއަށްދޭ ކޯޕާ ޓްރޮފީ ހާސިލްކުރި ސްޕެއިނުގެ ލަމީން ޔަމާލްގެ އިތުރުން ރޮޑްރީ އަދި އާޖެންޓީނާގެ ކުރީގެ ކެޕްޓަން، ލިއޮނަލް މެސީއެވެ.
ކޭން އަށް މޮޅު ކުޅުންތެރިޔާގެ އެވޯޑް ލިބުމުގެ އެންމެ ބޮޑު ސަބަބުތަކުގެ ތެރޭގައި އޭނާގެ ކްލަބު ބަޔާން އާއެކު ޑޮމެސްޓިކް ލީގާއި ކަޕް ކާމިޔާބުކުރުމާއެކު ނިމިދިޔަ ސީޒަނުގައި ކްލަބާއި ގައުމީ ޓީމަށް އޭނާ ޖަހައިދިން 73 ލަނޑު ފާހަގަކޮށްލެވެއެވެ.
ޔޫރަޕްގެ އެންމެ ގިނަ ލަނޑުޖެހި ކުޅުންތެރިޔާގެ މަގާމު ހޯދުމުގެ އިތުރުން އޭނާ ވަނީ ބަޔާނަށް ލަނޑުޖެހުމުގެ ރިކޯޑްތަކެއް މުގުރާލައިފައެވެ. މީގެއިތުރުން، ކޭންގެ ކެޕްޓަންކަމުގައި އިންގްލެންޑުން ފީފާ ވޯލްޑް ކަޕުގެ ތިންވަނަ މަގާމު ހާސިލްކުރިއިރު އޭނާގެ ދައުރުވެސް ބޮޑެވެ.
މިފަހަރުގެ އެންމެ މޮޅު އަންހެން ފުޓްބޯޅަ ކުޅުންތެރިޔާއަށްދޭ ބަލޮންޑޯ ކާމިޔާބުކުރީ ސްޕެއިނުގެ މިޑްފީލްޑަރު، އަލެކްސިއާ ޕުޓެޔާސްއެވެ. މިއީ މި އެވޯޑް އޭނާ ހޯދި ތިންވަނަ ފަހަރެވެ.
