ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، ޔޫކްރެއިނަށް އައު ރައީސަކު އިންތިހާބުކުރަންވީ ވަގުތު ޖެހިއްޖެ ކަމަށް.
ރަޝިޔާއާއެކު ޑީސަލް ސަޕްލައި ކުރުމުގެ އެއްބަސްވުމެއް އިޢުލާނުކުރެއްވިތާ އެއްދުވަސް ފަހުން، އެމެރިކާގެ ރައީސް ޑޮނަލްޑް ޓްރަމްޕް ވަނީ ޔޫކްރެއިންގެ ރައީސް ވޮލޮޑިމީރް ޒެލެންސްކީ މަގާމުން ވަކިކުރުމަށް ގޮވާލައްވާފައެވެ.
އަދި ރަޝިޔާގެ ތެލުގެ ވަސީލަތްތަކަށް ޔޫކްރެއިނުން ދެމުންދާ ހަމަލާތަކަށް ޓްރަމްޕް ވަނީ ވަރަށް ބޮޑަށް ފާޑުވިދާޅުވެފައެވެ. މި އެއްބަސްވުމާ ގުޅިގެން ޒެލެންސްކީ ވަނީ އެމެރިކާއަށް ވަރަށް ބޮޑަށް ފާޑުވިދާޅުވެފައެވެ.
ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، ޔޫކްރެއިނަށް އައު ރައީސަކު އިންތިހާބުކުރަންވީ ވަގުތު ޖެހިއްޖެ ކަމަށެވެ. އަދި ރަޝިޔާގެ ތެޔޮ ސާފުކުރާ ތަންތަނަށް ޒެލެންސްކީ ދެއްވާ ހަމަލާތަކުގެ ސަބަބުން ދުނިޔޭގެ ޑީސަލް ސަޕްލައިއަށް ބުރޫއަރާފައިވާ ކަމަށް ޓްރަމްޕް ވިދާޅުވިއެވެ.
"އޭނާ ބޭނުންވަނީ އަހަރެމެންގެ ދަނޑުވެރިންނަށާއި ޖަނަވާރު ގެންގުޅޭ މީހުންނަށް ޑީސަލްގެ ދަތިކަން ކުރިމަތިކުރުވަން. އެއީ މުޅި ދުނިޔެއަށް ބޭނުންވާ ޑީސަލްގެ ބޮޑު ބައެއް ރަޝިޔާއިން ފޯރުކޮށްދޭތީ،" ޓްރަމްޕް ވިދާޅުވިއެވެ.
ވައިޓް ހައުސްއަށް އަމާޒުކުރެއްވި އެންމެ ހަރުކަށި ފާޑުވިދާޅުވުންތަކުގެ ތެރޭގައި، ރަޝިޔާގެ ޑީސަލުން އެމެރިކާއިން ދަތިކުރުމުގެ ފިޔަވަޅުތައް އުވާލުމާއި، ހޮނިހިރު ދުވަހު ޔޫކްރެއިންގެ ޒަޕޮރީޜިއާ ސިޓީއަށް ރަޝިޔާއިން ދިން ހަމަލާއާ ޒެލެންސްކީ ވަނީ ގުޅުވާފައެވެ. މި ހަމަލާގައި ތިން ކުޑަކުދިން ހިމެނޭހެން 20 މީހުން މަރުވެފައިވެއެވެ.
ފެބްރުއަރީ މަހު އީރާން ހަނގުރާމަ ފެށުނު ފަހުން ދުނިޔޭގެ ބާޒާރުގައި ޑީސަލްގެ އަގު އިންތިހާއަށް އުފުލުމަކީ، ކުރިއަށް އޮތް މިޑްޓާމް އިންތިހާބާ ދިމާކޮށް ޓްރަމްޕްގެ ރިޕަބްލިކަން ޕާޓީއަށް ކުރިމަތިވެފައިވާ ސިޔާސީ ބޮޑު ގޮންޖެހުމެކެވެ. މި އިންތިހާބުގައި އިދިކޮޅު ޑިމޮކްރެޓުންނަށް ކޮންގްރެސްގެ ބާރު ލިބުމުގެ ފުރުސަތު އޮތް ކަމަށް ބެލެވެއެވެ.
