ދެކުނު ކޮރެއާގައި ބޭއްވުމަށް ހަމަޖެހިފައިވާ ބައިނަލްއަޤްވާމީ ބައްދަލުވުމެއްގައި އައްޑޫ ސިޓީ ކައުންސިލް ތަމްސީލުކުރެއްވުމަށް ދެ ކައުންސިލަރަކު ފޮނުވުމަށް އެ ކައުންސިލުން ފާސްކޮށްފިއެވެ.
މި ދަތުރުގައި ބައިވެރިވެވަޑައިގަންނަވާ ދެ ކައުންސިލަރުންނަކީ ކައުންސިލަރ އިބްރާހީމް ޝިނާޒް އަދި ކައުންސިލަރ އިސްމާޢީލް ސަޢީދެވެ.
ކައުންސިލުން މިގޮތަށް ފާސްކޮށްފައިވަނީ ވޯލްޑް ހިއުމަނިސްޓިކް ސިޓީސް ނެޓްވޯކްގެ ފަރާތުން އިންތިޒާމުކޮށްގެން، 2026 ވަނަ އަހަރުގެ އޮކްޓޯބަރ 29 އިން 31 އަށް ކޮރެއާގެ އެންޑޮންގ ސިޓީގައި ބޭއްވުމަށް ހަމަޖެހިފައިވާ "ސެކަންޑް ޖެނަރަލް އެސެމްބްލީ އޮފް ދަ ވޯލްޑް ހިއުމަނިސްޓިކް ސިޓީސް ނެޓްވޯކް" ގައި ބައިވެރިވުމަށެވެ.
މި ބައްދަލުވުމުގައި އައްޑޫ ސިޓީ ކައުންސިލްގެ ފަރާތުން މި ދެ ބޭފުޅުން ބައިވެރިވެވަޑައިގަތުމަށް ފާސްކުރި ނަމަވެސް، މި ދަތުރަށް ކައުންސިލްގެ ބަޖެޓުން ހިނގާނެ ޚަރަދުގެ އެއްވެސް ތަފްސީލެއް ކައުންސިލުން އަދި ހާމަކޮށްފައެއް ނުވެއެވެ.
މީގެ ކުރިން ވެސް އައްޑޫ ސިޓީ ކައުންސިލުން ވަނީ މިފަދަ ގިނަ ދަތުރުތަކެއް ކޮށްފައެވެ. އެގޮތުން އައްޑޫގެ ފަތުރުވެރިކަން ޕްރޮމޯޓް ކުރުމުގެ މަޤްޞަދުގައި، ލަންޑަނުގައި ބޭއްވި ވޯލްޑް ޓްރެވަލް މާކެޓް (ޑަބްލިއުޓީއެމް) ގައި ބައިވެރިވުމަށް 10 މަންދޫބުންގެ ވަފުދެއް ފޮނުވުމަށް ކައުންސިލްގެ ބަޖެޓުން 700،000 (ހަތްލައްކަ) އަށް ވުރެ ގިނަ ރުފިޔާ ޚަރަދުކޮށްފައިވާ ކަމަށް ކައުންސިލުން ކުރިން ހާމަކޮށްފައިވެއެވެ.
