އައްޑޫ ހުޅުދޫ ބައި-އިލެކްޝަނަށް ކުރިމަތިލީ ކެންޑިޑޭޓުންގެ ގުރުއަތުނެގުން މާދަމާ

ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ހުސްވެފައިވާ ގޮނޑިތަކަށް މެންބަރުން އިންތިހާބު ކުރުމަށް ބާއްވާ ބައި-އިލެކްޝަންތަކުގެ ތެރެއިން، އައްޑޫ ހުޅުދޫ ދާއިރާއަށް އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މަގާމަށް ކުރިމަތިލައި ޝަރުތު ހަމަވެފައިވާ ކެންޑިޑޭޓުންގެ ނަންތައް ތަރުތީބުކުރުމަށް ބާއްވާ ގުރުއަތުނެގުން މާދަމާ ބޭއްވުމަށް ހަމަޖެހިއްޖެއެވެ.

އައްޑޫ ހުޅުދޫ ކައުންސިލްގެ އިދާރާއިން ބުނެފައިވާ ގޮތުން، މި ގުރުއަތުނެގުން ކުރިއަށްދާނީ މާދަމާ ހެނދުނު 10:00 ގައެވެ. މި އިންތިހާބުގައި ވާދަކުރާ ކެންޑިޑޭޓުންގެ މެދުގައި ގުރުއަތުލުން ބޭއްވުމަށް ހަމަޖެހިފައިވަނީ އައްޑޫ ހުޅުދޫ ކައުންސިލް އިދާރާގައެވެ.

މި އިންތިހާބަކީ 2026 ނޮވެންބަރު 28 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައި-އިލެކްޝަނެވެ.

އިލެކްޝަންސް ކޮމިޝަނުން މިހާރު ވަނީ މި ބައި-އިލެކްޝަންތަކުގައި ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީ އާންމުކޮށްފައެވެ. މި ރަޖިސްޓަރީ ދިވެހި ސަރުކާރުގެ ގެޒެޓާއި، އިލެކްޝަންސް ކޮމިޝަނުގެ ވެބްސައިޓުގެ އިތުރުން، އިންތިހާބު ބާއްވާ ރަށްރަށުގެ ކައުންސިލް އިދާރާތަކުގައި އާންމުކޮށް ފެންނަން ހުންނާނެ ކަމަށް އީސީން ބުންޏެވެ.  

މި އިންތިހާބުތަކަށް ކުރިމަތިލުމުގެ ފުރުސަތު ހަމަވީ މި މަހުގެ 26 ވާ ހޯމަ ދުވަހުގެ މެންދުރުފަހު 14:00 ގައެވެ. އެގޮތުން، މި އިންތިހާބަށް ކުރިމަތިލާން އެދޭ ފަރާތްތަކުން ހުށަހަޅަންޖެހޭ އެންމެހައި ލިޔެކިޔުންތަކާއި، ދައްކަންޖެހޭ އިދާރީ ފީ ދެއްކުން ހަމަޖެހިފައިވަނީ އިލެކްޝަންސް ކޮމިޝަނުގެ މައި ޕޯޓަލް މެދުވެރިކޮށެވެ. 

މި ފަހަރުގެ ބައި-އިލެކްޝަންތަކުގެ ތެރެއިން ލޯކަލް ކައުންސިލްގެ ބައި-އިލެކްޝަން ބާއްވަނީ ވ. ތިނަދޫ ކައުންސިލްގެ ރައީސްގެ މަގާމު ހުސްވެފައިވާތީއެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަންތައް ބޭއްވުމަށް ހަމަޖެހިފައިވަނީ ހއ. ވަށަފަރު، ނ. ކުޑަފަރި، ވ. ތިނަދޫ އަދި ސ. ހުޅުދޫގައެވެ.  

ބައި-އިލެކްޝަންގައި އައްޑޫ ހުޅުދޫ ދާއިރާއިން ވޯޓުލުމުގެ ހައްގު ލިބިފައިވާ މީހުންގެ އަދަދަކީ 2،903 އެވެ.